Երեկ գիշեր Գյումրու Ղորղանյան փողոցի թիվ 191 հասցեում տեղակայված «Ալեքպոլ» ՍՊԸ-ի հարևանությամբ հրդեհ է բռնկվել: «Ալեքպոլ» կաթնամթերքի արտադրությունը պատկանում է Գյումրու նախկին քաղաքապետ Վարդան Ղուկասյանին:

Ինչ հանգամանքներում է հրդեհը բռնկվել եւ կան արդյոք տուժածներ, hraparak.am-ը պարզեց ԱԻՆ ծառայությունից եւ գործարանի աշխատակիցներից: Ըստ ԱԻՆ հաղորդագրության` օգոստոսի 22-ին, ժամը 00.45-ին ահազանգ է ստացվել, որ հրդեհ է բռնկվել Ղորղանյան փողոցի «Ալեքպոլ» ՍՊԸ-ի տանիքում: Դեպքի վայր է մեկնել մեկ մարտական հաշվարկ: Հրդեհը մեկուսացվել է ժամը 01.03-ին, մարվել 01.25-ին, այրվել է 20 քմ խոտածածկույթ և գործարանի տանիքի փայտյա կոնստրուկցիաները: «Ալեքպոլ» ՍՊԸ-ի աշխատակիցը` Հարութը Մխիթարյանը մեզ հետ զրույցում ընդգծեց. «Հրդեհը բռնկվել է գործարանի տարածքի հետնամասում, որը մեզ չի պատկանում: Վստահ ենք` միտումնավոր ոչինչ չկա, պարզապես հրդեհը տարածվել է, գործարանից ոչ ոք չի տուժել»: Տեղեկացանք, որ դեպքի առթիվ Կումայրի ոստիկանական բաժանմունքում նյութեր են նախապատրաստվում` հրդեհի պատճառն ու հանգամանքները պարզելու համար