ԼՂՀ ՊԲ հյուսիսային ուղղությամբ տեղակայված զորամասերից մեկի պահպանության տեղամասում, դեռեւս չպարզված հանգամանքներում մահացու վիրավորում ստացած 19-ամյա զինծառայող Վահան Միքայելյանի հարազատներին ասել են, որ նա ինքնասպան է եղել, սակայն, հարազատները չեն հավատում:
Հարեւանները NEWS.am-ի հետ զրույցում պատմեցին, որ զինծառայողի մահվան լուրն առաջինն իմացել են նախ հարեւանները ու Վահանի հոր ընկերները, որոնք էլ տեղյակ են պահել տղայի հորը: Վահան Միքայելյանի հայրն աշխատում է քաղաքի ծայրամասային՝ Տարոն թաղամասում գործող ատամանաբուժարանում:
Թե ինչպես է տեղի ունեցել դեպքը, ընտանիքի բարեկամները դժվարանում են ասել: Նրանք նշում են, որ իրենց ասել են, թե տղան ինքնասպան է եղել, բայց թե իրականում ինչպես է եղել դեպքը՝ կպարզի հետաքննությունը:
Տղայի մարմինը դեռ չեն բերել Վանաձոր:
Վահանը ԵՊՀ-ի տնտեսագիտական բաժնի ուսանող էր: Նա Վանաձորի բնակիչ է, ընտանիքի ավագ երեխան՝ ունի իրենից փոքր քույր:
Ավելի վաղ տեղեկացրել էինք, որ դեռեւս չպարզված հանգամանքներում զինծառայող է մահացել: Կատարվում է քննություն:
| 
