ԵԽԽՎ հերթական նիստին հայկական պատվիրակությունը կներկայացնի տեղի ունեցածը, արձանագրված փաստերը հիմք են տալիս, որպեսզի Ադրբեջանը ներկայացվի որպես պատերազմական հանցագործ: Այս մասին, այսօր՝ ապրիլի 12-ին, լրագրողների հետ զրույցում նշել է ՀՅԴ խմբակցության ղեկավար Արմեն Ռուստամյանը:
Նրա խոսքով, բնականաբար ադրբեջանցիները կփորձեն գլխիվայր շուռ տալ ամեն ինչ, բայց պետք է նաեւ որոշակի փաստաթղթային հիմքեր ունենանք մեր ձեռքին. մեծ աշխատանք է տարվում, ձեւավորվում է թղթածրար:
«Ընթացակարգով պայմանավորված, ովքեր դիմում են էդ հարցով ԵԽԽՎ բյուրոն որոշում է եւ այդ հարցը մտցնում է օրակարգ ամենայն հավանականությամբ դա տեղի կունենա, արդեն դրա հիման վրա բնականաբար քննարկումները կլինեն: Բանաձեւ չի ընդունվի, եթե ընթացիկ ընթացակարգով է մտնելու, ոչ թե հրատապ հարցի կարգավիճակով, որը կարծում եմ՝ նույնպես ճիշտ է, որովհետեւ նախորդ նստաշրջանում արդեն դրա հետ կապված փաստաթուղթ մերժվել է»,-ասել Ռուստամյանը՝ հավելելով, որ սա առիթ է լինելու բնականաբար, որպեսզի մենք ներկայացնենք տեղի ունեցածը:
«Բնականաբար ադրբեջանցիները փորձելու են գլխիվայր շուռ տալ ամեն ինչ, մեզ համար սովորական է արդեն դարձել, բայց պետք է փաստարկված, փաստաթղթային հիմքերով ունենանք մեր ձեռքի տակ այդ ամենը, որպեսզի մեր գործընկերներին ներկայացնենք կատարվածը եւ այդ առումով մեծ աշխատանք է սպասվում առաջին իսկ օրվանից»,-ընդգծել է դաշնակցական գործիչը:
Հարցին, թե միջազգային դատարան դիմելու ի՞նչ հնարավորություններ կան, Ռուստամյանը պատասխանել է. «Կարծում եմ, որ այն թղթածրարը, որի մասին խոսում էինք, պետք է արդեն ձեւավորվի, դրա համար հիմքեր կան, բավարար նյութեր գոյություն ունեն, մանավանդ այս վերջին դիակների փոխանցման ժամանակ ակնհայտորեն անդամահատված դիակներ կան, մեծ ծավալի նյութ է այդ առումով կուտակվել: Մնացած բոլոր արձանագրված փաստերը ապացուցողական հիմք են տալիս, որպեսզի Ադրբեջանը ներկայացվի որպես պատերազմի հանցագործ:
Ռազմական հանցագործությունների փաստերը նկատի ունենալով սա նույնպես պետք է ներկայացվի Եվրոպայի խորհրդին մնացած բոլոր ատյաններում, բայց առաջին հերթին իհարկե միջազգային դատարաններ, որ պարզ դառնա, թե ինչ վայրագությամբ է այդ պետությունը փորձում իր հարեւանների հետ հարցերը լուծել»:
Նյութի աղբյուր՝ news.am
|
